اور نام ستاروں کا تری چال پہ رکھ دوں- سردارسلیم کی غزل

غزل

 

دن بھر کی تھکن جوڑ کے رومال پہ رکھ دوں

مٹی سے سنے ہاتھ ترے گال پہ رکھ دوں

 

ناخن سے تراشا تھا جہاں تُو نے میرا نام

اک خواب سا لمحہ میں اسی ڈال پہ رکھ دوں

 

تُو کہہ دے تو میں ڈال دوں ردی میں کتابیں

صندل کی یہ شاخیں بھی کسی ٹال پہ رکھ دوں

 

زلفوں سے تری فال گھٹاؤں کا نکالوں

اور نام ستاروں کا تری چال پہ رکھ دوں

 

ہر چیخ کو نغمے کی طرح کر دوں ملائم

سسکی کی صداؤں کو بھی سُر تال پہ رکھ دوں

 

اچھی نہیں الفت میں سلیم اتنی گراوٹ

اظہار تمنا کو میں چونچال پہ رکھ دوں